स्याङ्जा र कास्की जिल्ला को दोसाँध फेदीखोला गाउँपालिका वडा नं. १ मट्टीखानमा अवस्थित श्री चण्डीडाँडा माध्यमिक पोखरा महानगरबाट दक्षिण–पश्चिम स्थित करिब १५ कि.मि. पश्चिममा सिद्धार्थ राजमार्गको कुविन्डे देखि पूर्वतर्फ करिब ७ कि.मि. को दूरी तथा फुस्रेखोला रामदीको उकालो हुदै करिब ९ कि.मि. को दूरीमा रहेको छ । समुन्द्र सतहदेखि १५२५ मि. को उचाइमा अवस्थित पर्यटकीय गाउँ मट्टिखानको काखमा रहेको यस संस्थाबाट विभिन्न हिमश्रृङ्खलाहरु दृश्यावलोकन गर्न सकिन्छ ।

हाल २६ रोपनी क्षेत्रफलको हरियाली दृष्यमा लुकामारी खेलेको अनुभूति हुने यो संस्थाले कहिले चौतारी, कहिले पायक पर्ने घरआँगन त कहिले खुला चौर हुदै स्याउलाको सामान्य झुप्रोबाट आफ्नो शैक्षिक इतिहास थालनी गरेको थियो । आज यो विद्यालय आकर्षक भवन एवं अन्य विविध शैक्षिक सुविधाहरु सहित व्यवस्थित छ। विद्यालय संस्थापकहरुको इच्छा र भावनालाई हृदयङ्गम गर्दै यस गाउँ र ठाउँका समाजसेवी एवं शिक्षाप्रेमी महानुभावहरुको न्यानो माया र ममता को छहारीमा अनेकन आरोह अवरोह पार गर्दै विद्यमान अवस्थासम्म आइपुगेको छ ।